කොළඹ උතුර ප්‍රදේශය භාර නියෝජ්‍ය පොලිස්පති වාස් ගුණවර්ධන මහතාට ලැබුණු ඔත්තුවක් මත සිදු කෙරුණු පරීක්ෂණ මෙහෙයුම් හරහා මේ මහා පරිමාණ ජාවාරමේ සියලු තොරතුරු හෙළිකර ගැනීමටත් සැකකරුවන් අත්අඩංගුවට ගැනීමටත් හැකිවී ඇත.
ඊයේ (8) පෙරවරුවේ සිට සිදු කෙරුණු මෙහෙයුමක ප්‍රතිඵල මත සැකකරුවන් සමඟ බවුසරයත් ගබඩාවත් සොයාගනු ලැබුවේ දොම්පේ ප්‍රදේශයෙනි.
රුපියල් දොළොස් ලක්ෂ අටදහසක දැවි තෙල් එම බවුසරයේ අඩංගු වෙයි. දිනකට එවැනි බවුසර් 10 - 20 අතර ප්‍රමාණයක් පිටකරන බවට තොරතුරු අනාවරණය වී ඇත.
මින් රජයට දිනකට රුපියල් කෝටි තුනක පමණ විශාල පාඩුවක් සිදු වෙයි.
එක්තරා පිරිසක් සංවිධානය වී සපුගස්කන්ද තෙල් පිරිපහදුවේ ඇතැම් පුද්ගලයන්ගේද සහාය ඇතුව කාලයක් තිස්සේ මේ ජාවාරම මහා පරිමාණයෙන් සිදු කරගෙන ගොස් ඇත.
රජයේ විදුලි බලාගාර සහ බොයිලේරුවල පාවිච්චිය සඳහා මේ දැවි තෙල් භාවිත වෙයි.
පෞද්ගලික ව්‍යාපාර සඳහා මේවා සපුගස්කන්ද තෙල් පිරිපහදුවෙන් මිලදී ගත යුතු වෙයි. එසේ ඉල්ලුම් කරන පුද්ගලයන්ට රජයට මුදල් ලැබීම වෙනුවට මෙසේ අත යට අලෙවි කිරීමේ ජාවාරම සිදු වෙයි.
දොම්පේ ගබඩාවේ දැනට තෙල් ලීටර් ලක්ෂ තුනක් පමණ තිබේ. ඒවා නැව් තෙල් බව සැකකරුවන් ප්‍රකාශ කර ඇත. එහි සත්‍යතාවය හෙළි කර ගැනීම සඳහා පරීක්ෂණ සිදු වෙයි.
