පසුගියදා විකාශනය වී නිම වූ සඳ සිත්තම් ටෙලි නාට්‍යයේ පින්තූර ගනිමින් නිතරම නුවර වැව වටේ යන ‘මතී’ ව ඔබට මතකද?
සතියේ දිනවල සිරස ටී.වී. ඔස්සේ විකාශය වන යශෝධරා ටෙලි නාට්‍යයේ යශෝධරාගේ දුව “අංජලීත්” මේ “මතී” ම තමයි. මේ දවස්වල ඇය සෑහෙන්න කාර්ය බහුලයි.මතී, එහෙමත් නැත්නම් අංජලී හැටියට අපේ හිත්වල ලියවුණාට ඇගෙ හැබෑ නම උත්පලා මධුෂානි.
මුලින්ම ඔබ ගැන විස්තර ටිකක් කියමු.
මම උත්පලා මධුෂානි. මට මල්ලි කෙනෙකුයි අයියා කෙනෙකුයි ඉන්නවා. මගේ තාත්තයි අයියයි විදේශයක රැකියාව කරන්නේ. මම අධ්‍යාපනය ලැබුවේ “කුරුවිට මධ්‍ය මහා විද්‍යාලයේ
උත්පලාට කලා ක්ෂේත්රයට එන්න මග පෑදුනේ කොහොමද?
සිරස කුමරිය 2007 තරගයට මම ඉදිරිපත් පත්වුණා. ඒ තරගයට තරග කාරියන් 6000 ක් විතර ඇවිත් හිටියා ඒකෙන් මම අන්තිම හැටදෙනා අතරට තේරුණා. අවසානයේ මම ඒ තරගයේ ‘ඡවි’ කල්‍යානි විදිහට තේරුණා. ඒකෙන් පස්සෙ තමයි මට කලා ක්ෂේත්රයට පය තියන්න ලැබුණෙ.
ඔබගේ ප්‍රථම රංගනය ගැන සිහිපත් කළොත්
සිරස රූපවාහිනිය ඔස්සේ විකාශනය වුණ “පතිනි” ටෙලි නාට්‍ය මගේ ප්‍රථම ටෙලි නාට්‍ය කිව්වොත් නිවැරදියි. එම ටෙලි නාට්‍යයේ “පවනි” කියන චරිතය තමයි මං මුලින්ම රඟපෑවෙ.
ඉන්පස්සෙ
ඉන්පස්සෙ ඉසිවර රණකෙලි, ආදරණීය පූර්ණිමා සඳසිත්තම්, ආදරෙයි අහස තරම් , යශෝධරා නාට්‍ය වල රඟපෑවා. දැනට රඟපා තිබෙන ටෙලි නාට්‍ය අතුරින් වඩාත්ම කැමති චරිත දෙකක් තිබෙනවා. ආදරණීය පූර්ණිමා ටෙලි නාට්‍යයේ “සඳුනි” චරිතය වගේම සඳසිත්තම් ටෙලි නාට්‍යයේ “මතී” ගේ චරිතයටත් මම ගොඩාක් කැමතියි.
ඔබ නිවේදිකාවක් හැටියටත් කටයුතු කළා නේද?
ඔව්. මම සිරස ‘පතිනි’ ටෙලිනාට්‍යයේ රඟපෑවට පස්සෙ ස්වර්ණවාහිනියේ “රසලිය” කියන වැඩසටහනේ වසර දෙකක් නිවේදන කටයුතු කළා.
උත්පලා නිවේදන කටයුතුවලටද රඟපෑමටද වඩාත් කැමැති?
මට දැන්නම් නිවේදන කටයුතුවලට යෙදෙන්න වෙලාවක් නැතිතරම්. මම මගේ වැඩි කාලයක් යොදවන්නේ ටෙලිනාට්‍ය සඳහායි. මම වඩාත් කැමතියි රංගන කටයුතුවලින් ඉදිරියට යන්න. හැබැයි කාලය ලැබෙන විදියට නිවේදන කටයුතුවල යෙදෙන්නත් කැමතියි.
මේ වකවානුවේ තිබෙන බොහෝ ටෙලි නාට්‍ය තුළ ඒකාකාරීභාවයක් දක්නට ලැබෙනවා. ඔයා මොකද ඒ ගැන කියන්නේ?
ඇත්තටම මම තවම නිර්මාණ කිහිපයකට පමණයි මගේ දායකත්වය ලබාදිලා තියෙන්නේ. ඉතින් ඒ නිර්මාණ එකිනෙකට වෙනස් චරිත වලින් යුක්තයි. අනික මම තවම මේ ක්ෂේත්රයට ආධුනික නිසා මට නම් ඒ පිළිබඳව ඒකාකාරි බවක් දැනෙන්නේ නැහැ. මට ලැබෙන හැම චරිතයක් පිළිබඳවම මම තෘප්තිමත්. ඒ හැම චරිතයකටම මම මගේ උපරිම දායකත්වය ලබා දී තිබෙනවා.
උත්පලා මේ වන විට පෙම්වතියක් ද?
ඒ දවස්වල නම් පෙම්වතියක්වෙලා හිටියා. නමුත් දැන්නම් මම පෙම්වතියක් නමෛයි. අපි දෙන්නාගේ අදහස්වල නොගැළපීම් නිසා අපි සුහදව වෙන්වුණා.
මේ දිනවල මොනවද රඟපාන අලුත් නිර්මාණ?
මෙගා ටෙලි නාට්‍ය දෙකකට රංගනයෙන් දායකත්වය සපයනවා. ඊට අමතරව ඉදිරියේදී හොඳ නිර්මාණ ලැබුණොත් චිත්‍රපටවල රඟපෑමට බලා‍පොරොත්තුවෙන් ඉන්නවා.
උත්පලා ආශාවෙන් රඟපෑමට බලා‍පොරොත්තු වන චරිතයක් එහෙම තිබෙනවාද?
මම ආසයි මෙහෙණියකගේ චරිතයක් රඟපාන්න ලැබෙනව නම්.
මේ ක්ෂේත්රයට එන නවක නිළියන්ගේ චෝදනාවක් තිබෙනවා කලා ක්‍ෂේත්‍රයේ ප්‍රවීණයින් නවකයන්ට “කැපිල්ල” දානවා කියලා ඔයාටත් එවැනි අත්දැකීම්වලට මුහුණ පෑමට සිදුවී තිබෙනවාද?
“මම තවම ලොකු පිරිසක් සමග රංගනයේ යෙදී නැහැ. දැනට මම කළ හැම ටෙලි නාට්‍යයකම ප්‍රවීණයින් වගේම නවකයිනුත් මට ගොඩාක් උදව් කරලා තියෙනවා. ඒ හැමෝම එක්ක මම සහයෝගයෙන් වැඩ කරනවා. අනික ප්‍රවීණයින්ගෙන් මට එහෙම දෙයක් වුණත් මම ඒ අය සමග ප්‍රශ්න ඇති කරගන්න යන්නේ නැහැ.
උත්පලා ඔයා නිළියක් නොවුණානම් මොනවගේ ක්‍ෂේත්‍රයක් තෝරා ගනීවිද?
මම පාසල් යන කාලෙ ඉඳලම නර්තනයට වැඩි කැමැත්තක් දැක්වුවා. ඒ වගේම නර්තනය පිළිබඳ ගොඩාක් දේවල් ඉගෙන ගත්තා. ඒ නිසා මම රඟපෑම තෝරා ගත්තෙ නැත්නම් නැටුම් ගුරුවරියක් විදියට මගේ වෘත්තීය කරගෙන යාවී.
රූගතකිරීම් අතර තුර අමතක නොවන සිද්ධිවලටත් උත්පලා මූණදීලා තියෙනවා. මේ එවන් එක සිදුවීමක්.
උත්පලාට ආදරණීය පූර්ණිමා ටෙලිනාට්‍ය රූපගත කිරීමට ගිය වෙලාවක අකරතැබ්බයකට මුහුණ පාන්නත් සිදුවුණාලු. සාමාන්‍යයෙන් ඇය හැම ටෙලිනාට්‍යයකම සෑම රූපගත කිරීමකටම යන්නේ තම මවත් එක්ක. මේ කියන ටෙලිනාට්‍ය රූපගත කරන්නත් ඇය මව සමග ගොස් ඔවුන්ට වෙන්කර තිබෙන කාමරයක නවාතැන් ගෙන තිබෙනවා. සෑම දිනකම උදෑසන 4.30 වෙනකොට ටෙලිනාට්‍ය කණ්ඩායමටම උදේ තේ එක ගෙනත් කාමරේ දොරට තට්ටු කරනවලු. ඒ වෙලාවට ඒ කට්ටිය කාමරේ දොර ඇරලා තම තමන්ගේ තේ කෝප්ප ගන්නවලු. එදත් උදේ පාන්දරම උත්පලාගෙ මව මූණ හෝදමින් ඉඳලා තිබෙනවා. සුපුරුදු පරිදිම අඩ අඳුරේ කාමරේ දොරට තට්ටු කරන හඬ ඇහිලා වෙනදා අම්මා ගිහින් ගන්න තේ එක එදා උත්පලා තමයි ගන්න ගිහින් තියෙන්නේ. දොර අරිනවත් එක්කම අඩ අඳුරේ “ලෙන්චිනා වගේ” ඇඳගත් කෙනෙක් හිටගෙන හිටියලු. මේක දැක්ක උත්පලා යටිගිරියෙන් කෑ ගහගෙන වැටිලා ඒ වැටුණ පාරට ඇයගේ බෙල්ල උලුක් වෙලා තියෙනවා. දවස් දෙකක් යනකම් උත්පලාට කිසිම දෙයක් කරගන්න බැරිව ඉඳලා.
උත්පලාව මේ විදිහට බය කරන්න ඇවිත් තියෙන්නේ හිතවත් කලාකරුවෙක්. රූපගත කිරීම් කරන්න ආව කට්ටිය කතාවෙලා තමයි මේ වැඩේ කරලා තියෙන්නේ.
ලක්බිම - ශිරෝනි ග්‍රේරෝ, ඡායාරූප : ජානක කඳනාරච්චි
