හලාල් සහතිකය මින් ඉදිරියට මෙරට තුළ භාවිතා නොකරන බව ලංකා වානිජ මණ්ඩලය ප‍්‍රකාශ කළා. කොළඹ අද (11) පෙරවරුවේ පැවති මාධ්‍ය හමුකට එක්වෙමින් එහි සභාපති සුසන්ත රත්නායක කියා සිටියේ මින් ඉදිරියේදී මෙරටින් අපනයනය කරන භාණ්ඩවලට පමණක් හලාල් සහතිකය නිකුත් කරන බවයි.
මෙම මාධ්‍ය හමුවට සමස්ත ලංකා ජමියතුල් උලමා සභාවේ නියෝජිතයින්ද එක්ව සිටියා. එහිදී අදහස් දැක්වූ සමස්ත ලංකා ජමියතුල් උලමා සභාවේ, හලාල් සහතිකය නිකුත් කරන අංශයේ ප‍්‍රධානී මුර්ෂීඞ් මුලාසර් කියා සිටියේ හලාල් ලාංඡනය ජාතික සමගිය සඳහා ගැටළුවක් වේ නම් එය ඉවත් කරගැනීමට ද තමන් සූදානම් බවයි.
මතබේදයට තුඩුදුන් හලාල් සහතිකය සම්බන්ධයෙන් ශ්රී ලංකා වානිජ මණ්ඩලය මෙම තීරණ ගැනීමට පෙර කර්මාන්ත ක්ෂේත‍්‍රය නියෝජනය කරන තම සාමාජිකයින් සමගද සාකච්ඡ කර තිබෙනවා. නව තීරණවලට එලඹීමට පෙර සමස්ත ලංකා ජමියතුල් උලමා සභාව භාණ්ඩ නිෂ්පාදකයින්ගෙන් ඉල්ලා සිටියේ හලාල් සහතිකය සහිතව සහ රහිතව එකම භාණ්ඩය වෙළඳපොළට නිකුත් කරන ලෙසයි.
කෙසේ වෙතත් එම තීරණය ප්රායෝගිකව ක්රියාත්මක කළ නොහැකි බවට තම නියෝජිතයින් ප‍්‍රකාශ කළ බව ශ්රී ලංකා වානිජ මණ්ඩලය අද පැවති මාධ්‍ය හමුවේදී මාධ්‍ය වෙත ලබාදුන් නිවේදනයක සඳහන්. වෙළඳ සැල්වල ඇති සීමිත ඉඩ ප‍්‍රමාණයේ එකම භාණ්ඩය හලාල් ලාංඡුනය සහිතව සහ රහිතව අලෙවි කිරීමද ප්රායෝගික නොවන බව එහිදී තීරණය වී තිබෙනවා.
හලාල් සහතිකය නිකුත් කිරීම සම්බන්ධයෙන් පාර්ශව කිහිපයක් පැවැත්වූ සාකච්ඡාවලින් පසු පහත දැක්වෙන කාරණා 7ක් යටතේ එකඟතාවට පැමිණ තිබේ.
01 - සීඝ්‍රයෙන් අලෙවි වන පාරිභෝගික වෙළඳ භාණ්ඩ සඳහා හලාල් සහතිකය ලබා ගැනීමේ ක්‍රියාවලියේදී එම ආයතන තම නිෂ්පාදන ක්‍රියාවලියේ පෙර හෝ පසුව කිසිම අවස්ථාවක, කිසිම ආගමික කටයුත්තක දැනට නිරත නොවේ. මින් ඉදිරියටත් එය එපරිදිම ක්රියාත්මක වේ.
02 - අමුද්‍රව්‍ය ලබා ගැනීම, නිෂ්පාදනය සහ බෙදාහැරීම ප්රායෝගිකව අති සංකීර්ණ කර්තව්‍යයක් බවට පත්වන නිසා, හලාල් ලාංඡනය සහිතව සහ රහිතව එකම භාණ්ඩය නිෂ්පාදනය සහ අලෙවි කිරීමේ යෝජනාව, ප්රායෝගික නොවේ. තවද, එකම භාණ්ඩය හලාල් ලාංඡනය සහිතව සහ රහිතව අලෙවි කිරීමේදී, පාරිභෝගිකයින් අසීරුතාවයට පත්විය හැක.
03 - වෙළඳසැල්වල ඇති සීමිත ඉඩ ප්‍රමාණය තුළ එකම භාණ්ඩය හලාල් ලාංඡනය සහිතව හා රහිතව ප්‍රදර්ශනය හා අලෙවි කිරීම ප්රායෝගික නොවේ.
04 - ශ්රී ලංකාව තුළ අලෙවි කරන භාණ්ඩවල හලාල් ලාංඡනය ප්‍රදර්ශනය කිරීම සිදුනොවේ. නමුත් අපනයනය වැනි වෙළඳ අවශ්‍යතා මත, සමාගම්වලට තම අභිමතය පරිදි හලාල් සහතිකය ලබා ගත හැකි අතර සමස්ත ලංකා ජම්මියතුල් උලමා (ACJU) සංවිධානය මගින් එය නොමිලේ සිදුකරනු ඇත.
05 - විදේශ සංචාරකයින් සඳහා පවත්වාගෙන යනු ලබන විශේෂ වෙළඳසැල් තුළ අලෙවි වන භාණ්ඩවල හලාල් ලාංඡනය ප්‍රදර්ශනය කළ හැක.
06 - සියලූම නිෂ්පාදන ආයතන තුළ හලාල් ලාංඡනය මුද්‍රණය කරන ලද නිෂ්පාදන තොග සැලකිය යුතු ප්‍රමාණවලින් ඇති බැවින් එම තොග සම්පූර්ණයෙන්ම වෙළඳපොළෙන් ඉවත්වීමට සැලකිය යුතු කාලයක් වැයවේ. ඒ අනුව හලාල් ලාංඡනය ඇති තොග සම්පූර්ණයෙන්ම අවසාන වන තුරු, හලාල් ලාංඡනය සහිත භාණ්ඩ වෙළඳපොළේ අලෙවියට තිබෙනු ඇත.
07 - හලාල් ලාංඡනය රහිත භාණ්ඩ වෙළඳපොළ තුළ අලෙවිය සහතික කිරීම කඩිනම් කිරීම සඳහා සියලූම නිෂ්පාදන ආයතන තම ඇසුරුම්වලින් හලාල් ලාංඡනය ඉවත් කිරීමට වහාම ක්රියාත්මක වන පරිදි පියවර ගනු ඇත.
සියලූම පාරිභෝගිකයින්ගේ අවශ්‍යතා සැපිරෙන පරිදි පාරිභෝගික භාණ්ඩ නිෂ්පාදනය කිරීමටත්, එම භාණ්ඩ රජය මගින් පනවා ඇති සියලූම නීති රීතිවලට අනුකූලවත්, ඉතාමත් උසස් ප්‍රමිතීන්ට අනූව, සෞඛ්‍යාරක්ෂිතව නිපදවීමට අප සියලූම සාමාජිකයින් ඇප කැප වී සිටින බවද දන්වා සිටිමු.
